Roma Papası Bakıda “işğal olunmuş torpaqlar” deyəcəkmi…

0
399

“Roma Papası Azərbaycana və Gürcüstana sülh mesajı ilə gedir”. “The Washington Post” qəzetinin Papanın Gürcüstana və Azərbaycana bu gün başlayan səfəri haqda məqaləsi belə adlanır.

Roma Papası Fransiskin Qafqaz turu yayda Ermənistandan başlayıb. Sentyabrın 30-da isə o, Gürcüstan və Azərbaycana 3 günlük səfərə çıxıb. Papanın bu səfərində də dini görüşlərin arxasında geosiyasi məsələlərin də gündəmə gələcəyi istisna edilmir.

Qəzet yazır ki, Papanın Qafqaz turu onu dilemma qarşısında qoyub. Çünki Rusiyanı incitmək istəməyən, Rusiyayla münasibətlərini qorumağa çalışan Papa insan haqları məsələsində zəifliyinə görə qınana bilər.

Belə ki, Gürcüstan bu səfərdən öz maraqlarını önə çəkmək – Avropa və Qərblə bağlı arzularını işıqlandırmaq, Cənubi Osetiya və Abxaziyanın Rusiya tərəfindən işğalına diqqət çəkmək üçün istifadə etmək niyyətindədir. Papanın qaçqınlarla bağlı həssaslığını bilən gürcülər onun işğal olmuş ərazilərdən köçmüş qaçqınların vəziyyəti barədə danışmağını istəyirlər.

Amma Rusiyanın Ukraynadakı rolundan danışmayan Papa Fransiskin  ümumi sülh çağırışlarından əlavə nə isə deyəcəyi gözlənmir.

«The Washington Post» yazır ki, Papa yəqin ki, Rusiyanı, ya da Rusiya Pravoslav kilsəsini narazı salmaq istəməyəcək. Gürcüstanın Vatikandakı səfiri Tamara Qrdzelidze  Papanın «işğal» sözünü işlədəcəyinə şübhə ilə yanaşır: «Hərçənd Ermənistanda o, «soyqırımı» haqda danışmışdı». Tamara Qrdzelidze  bunu «The Washington Post»a müsahibəsində deyib.

Bəs Azərbaycanda Papanın sülhə çağırışı nədən ibarət olacaq? «İşğal olunmuş torpaqlar» məsələsi haqda heç yanda heç bir fikir səslənmir. Yayda İrəvanda səfərdə olanda Qarabağ məsələsinə işarə edən Papa bütün tərəfləri barışığa və intiqamın aldadıcı gücünə tabe olmamağa çağırmış, “kiçik ərazilərə görə sülhə gəlməmək qəddarlıqdır” demişdi.

“The Washington Post” yazır ki, əslində Papa Francis Qafqaza bir dəfə gəlmək, iyunda Ermənistandan Azərbaycana getməklə bu iki ölkə arasında simvolik körpü göstərmək istəmişdi. Amma Qarabağ münaqişəsinə görə səfər iki dəfəyə gerçəkləşdi.

Vatikanın məlumatına görə, Roma Papası Bakıda cəmi 10 saat qalacaq. Onun dövlət rəsmiləri, Qafqaz Müsəlmanları İdarəsinin rəhbəri Allahşükür Paşazadə və milli azlıqların nümayəndələriylə görüşü, Şəhidlər Xiyabanını ziyarət edəcəyi gözlənir. O, Bakıdakı katolik kilsədə, katoliklərin dini mərasimində də iştirak edəcək. (“Azadlıq” radiosunun xülasəsi)

BIR CAVAB BURAXIN

Please enter your comment!
Please enter your name here

17 + seventeen =