Dünya tarixində rəqiblərin zəhərlə aradan qaldırılmasına dair çoxlu sayda faktlar var. Özü də əksər hallarda zəhərli sui-qəsdlərin qurbanı məhz görkəmli siyasi xadimlər, sərkərdələr olub. Bu gün mədəniyyət beşiyi kimi təqdim edilən Avropanın da tarixi zəhərli sui-qəsdlərlə zəngindir desək səhv etmərik. Ümumiyyətlə götürdükdə isə XVIII əsrin ortalarından başlayaraq zəhərli sui-qəsdlər Avropada da geniş yayılmışdı. XIX yüzilliyin ən böyük bəstəkarlarından biri -Vinçenso Bellini də zəhərin qurbanı olub. Onun məşhurlaşmasına paxıllıq edən dostu Vinçenso Bellininin yeməyinə zəhər qatır. Yeməkdən az sonra Bellininin sifəti qapqara qaralır və mədəsində dəhşətli sancılar başlayır. Şahidlərin dediyinə görə, bəstəkar zəhərləndiyini anlayan kimi əlilə dostunu göstərir. Çünki zəhərin təsirindən danışa bilmir. Əvvəlcə, onun nə dediyini başa düşmürlər, lakin sonralar Bellininin ölümqabağı nə demək istədiyi aydın olur. Dostu özü də ölümündən əvvəl Bellinini zəhərlədiyini etiraf edir. Məşhur bəstəkar Motsart da zəhərin qurbanı oldu. Nə qədər qəribə olsa da, onu da dostu zəhərləyir. Yazıçı-tədqiqatçı Paul Aron “Tarixin böyük sirləri” kitabında yazır ki, Motsart zəhərlənəcəyini öncədən hiss edibmiş və tez-tez ona verilən yeməklərdən şübhələnir və onu yoxladırmış. Ancaq ən çox inandığı dostu tərəfindən zəhərlənə biləcəyi ağlına belə gəlmir və bunun da qurbanı olur. Onu da qeyd edək ki, Paul Aronun bu kitabında məşhur adamların zəhərlənmələri barədə yüzlərlə faktlar var. Bir vaxtlar dünyaya meydan oxuyaraq Avropanı ram edən məşhur sərkərdə Napoleon da zəhərlənərək öldürülüb. Fransız tarixçisi Rene Mauray “Napoleonun qatilləri” adlı kitabında yazır: “Uzaq Yelena adasında sürgündə olan Napoleonun buradan qaça bilməsi təhlükəsindən qurtarmaq üçün həbsxananın rəhbəri ondan canını qurtarmaq qərarına gəlir. O, şəraba zəhər qatdıraraq Napoleona içirdir. Amma zəhər çox güclü olmadığından Napoleon əzablar içində çırpınmağa başlayır. O, uzun müddət sancılar içində qovrulur və nəhayət ölür. Üstündən illər ötəndən sonra onun saçından götürülən analiz zamanı Napoleonun, həqiqətən də zəhərlənərək öldüyü aydın olur. Tarixçilər Napoleonun Böyük Britaniya kraliçası tərəfindən öldürüldüyünü də iddia edirlər. Çünki Napoleonun sağ qalmasını onlar özləri üçün daha böyük təhlükə hesab edirdilər. Belə güman edilir ki, əvvəlcədən düşünülmüş şəkildə Napoleona zəhər verilməsi planı hazırlanıbmış. Həbsxana rəhbəri də Napoleondan yaxa qurtarmaq üçün ona edilən təklifi dərhal qəbul edibmiş. Amma burada da ingilislərə məxsus qəddarlıq və qeyri-insani hərəkət özünü büruzə verib. Napoleona düşünülmüş şəkildə daha az tərkibli zəhər verilibmiş. Nəticədə, zəhər veriləndən 6-8 gün sonra Napoleon dəhşətli ağrılar içində qıvrılıb. Yeri gəlmişkən onu da deyək ki, Hindistana qədər uzanan böyük bir ərazini işğal edən Makedoniyalı İsgəndər 33 yaşında ikən Babil şəhərində qəfildən ölür. Araşdırmalar zamanı ona zəhər verildiyi məlum olur. Düzdür, o vaxt belə hesab edirdilər ki, İsgəndər qızdırmadan ölüb. Amma bu ölümün qızdırma ilə əlaqələndirilməsi də təsadüfi olmayıb. Belə ehtimal edilir ki, İsgəndər ən yaxın adamlarından biri tərəfindən zəhərlənib. Ona görə də İsgəndərin zəhərlənərək ölməsi barədə məsələ gizli saxlanılıb.
Ruslar da zəhəri əsas silah seçiblər
1917-ci ildə Rusiyada hakimiyyətə gələn bolşeviklər əvvəlcə özlərinə düşmən hesab etdikləri adamların hamısını “inqilab düşməni” adı altında güllələtdilər. Sonra bunun xalq arasında narazılığa səbəb olduğunu başa düşdülər və digər yol seçdilər. Həmin dövrdə, demək olar ki, düşmən hesab edilən adamların hamısını bolşeviklər Leninin göstərişilə zəhər verərək öldürdülər. Yeri gəlmişkən xatırladaq ki, bolşeviklərdən əvvəl çar sarayının ən yaxın adamı olan Rasputinə də zəhər vermişdilər. Rasputin, demək olar ki, sarayı idarə edirdi. Çar II Nikolay və arvadı Rasputinin bir sözünü iki eləmirdilər. Rasputindən qurtarmaq üçün sarayda onunla rəqabətdə olan əyanlar onun içdiyi şəraba zəhər qatırlar. Amma güclü bir həkimlik qabiliyyətinə malik olan Rasputin dərhal içdiyini qaytarır və ölümdən qurtara bilir. Amma zəhər onun bir əlini iflic edir. Rasputinin zəhərdən yaxa qurtardığını görən əyanlardan bir qrupu ona qarşı sui-qəsd təşkil edir və güllələyirlər.
Əziz Mustafa
