Avropa Liqasının qrup mərhələsində “Qarabağ”ın rəqibi olan “Vorksla” növbəti maliyyə problemi ilə üzləşib.
Qol.az-ın xəbərinə görə, Ukrayna mətbuatı klubun futbolçuların maaşlarını azaltdığını yazıb. İki oyunçu – Mladen Bartuloviç və Sergey Siminin isə borlclarını ala bilmədiyi üçün klubu tərk edib.
Klubun fəxri prezidenti Konstantin Jevaqo isə yerli mediaya açıqlamasında bildirib ki, “Vorksla”nın maliyyə problemi yoxdur. “Onu deyə bilərəm ki, klubumuzun oynaması və qalib gəlməsi üçün yetərincə resursu var. “Vorskla” hər zaman vədini yerinə yetirib və futbolçuların pulunu ödəyib. Heç kim bunun əksini iddia edə bilməz. Mən konkret borclar, yaxud digər öhdəliklər barədə danışmaq istəməzdim. Əgər məsələ ilə bağlı Ukrayna Futbol Federasiyasına hər hansı müraciət olubsa, bu məsələdə klubun öz mövqeyi var ki, kimin ödəmələrini necə həyata keçirsin”.
Qeyd edək ki, “Vorksla” ötən mövsümünün gedişatında da ciddi maliyyə problemləri ilə üzləşib. Sonradan bu məsələ müəyyən dərəcədə həll olunub. Poltava təmsilçisi 2017/18 mövsümünü Ukrayna Premyer Liqasında üçüncü yerdə başa vurmaqla Avropa Liqasında oynamaq hüququ qazanıb.
