Oleq Krapivinin şərəfinə sərbəst güləş üzrə VI açıq Respublika turniri  keçirilir  

0
422

Ötən gün Şamaxı Olimpiya İdman Kompleksində Əməkdar Bədən Tərbiyəsi və İdman Xadimi Oleq Krapivinin şərəfinə 2004-2005-ci il təvəllüdlü yeniyetmələr arasında sərbəst güləş üzrə VI açıq Respublika turniri start götürüb.

Azərbaycanı bütün dünyaya tanıdacaq bu  önəmli yarışın keçirilməsində həmyerlimiz Oleq Krapivinin xidmətləri olduqca böyükdür. Bu yarış da məhz məşhur idmançının öz vəsaiti hesabına təşkil edilib.

Yarışların təşkilat komitəsinin üzvü, Salyandakı Aran İdman klubunun sədri Abdullayev Vüqar “Oxu məni” qəzetinə verdiyi açıqlamasında deyib ki, yarışlarda Azərbaycan, Rusiya, Ukrayna, Gürcüstan, İran, Qazaxıstan və Qırğızıstandan ümumilikdə 300-ə yaxın güləşçi mübarizə aparır. O qeyd edib ki, yarışların mükafat fondu 4500 dollar  təşkil edir: “Birinci yeri tutan güləşçilərə 300 dollar. Ikinci yeri tutanlara 150, üçüncü yeri tutanlara isə 100 dollar mükafat veriləcək. Bundan  əlavə həvəsləndirici mükafatlar da nəzərdə tutulub. Yarış iştirakçılarının bütün xərcləri isə həmyerlimiz, məşhur bədən tərbiyəsi xadimi Oleq Krapivin tərəfindən ödənilir. Əminik ki, yarış içtirakçısı olan uşaqlar arasında Azərbaycanı bütün dünyaya tanıdacaq Olimpiya, Avropa və dünya çempionları çıxacaq”.

 

Qeyd edək ki,  yarışın açılışından əvvəl rəsmi şəxslər əvvəlcə şəhərdə yerləşən Heydər Əliyev abidəsini və mərkəzini ziyarət edib. Şamaxı İcra Hakimiyyətinin başçısının müavini Gülnisə Ələkbərova qonaqlarla görüş keçirib.

 

Daha sonra Şamaxı Olimpiya İdman Kompleksində turnirin açılış mərasimi keçirilib. Mərasimdə Gənclər və İdman Nazirliyinin nümayəndəsi Tofiq Eyvazov, Azərbaycan Güləş Federasiyasının vitse-prezidenti Namiq Abdullayev, Ukraynanın olimpiya çempionu Elbrus Tedeyev, Bakı Şəhər Gənclər və İdman Baş İdarəsinin rəisi Raqif Abbasov, Diasporla İş üzrə Dövlət Komitəsinin departament rəhbəri Ruslan Quliyev və veteran güləşçi Oleq Krapivin çıxış edib.

 

Çıxışlarda dünyada idman ölkəsi kimi tanınan Azərbaycanda dövlətin bu sahəyə göstərdiyi yüksək diqqət və qayğıdan danışılıb. Bildirilib ki, bunun nəticəsində ölkəmiz mötəbər beynəlxalq yarışlara uğurla ev sahibliyi edir. İdmançılarımızın beynəlxalq arenada uğurla çıxış etdiyini bildirən natiqlər ölkəmizin Olimpiya hərəkatı, eləcə də idmanın inkişafı istiqamətində qazandığı nailiyyətlərdən bəhs ediblər.

Tədbirdə Azərbaycanda güləşin inkişafında Oleq Krapivinin mühüm xidmətləri diqqətə çatdırılıb, onun şərəfinə həsr olunan turnirin təşkilinin artıq ənənəyə çevrildiyi vurğulanıb. Qeyd edilib ki, belə yarışlar istedadlı yeniyetmə güləşçilərin üzə çıxarılması baxımından mühüm əhəmiyyət daşıyır. Sonda Oleq Krapivin Gənclər və İdman Nazirliyinin fəxri fərmanı ilə təltif olunub.

 

 

Görkəmli güləşçi Oleq Krapivin Azərbaycanda idmanın, xüsusi ilə güləşin inkişafında verdiyi böyük töhfələrə, o cümlədən Şamaxıda öz hesabına güləş məktəbi açması və hər il republikamızın bu gözəl guşəsində güləş üzrə yarışlar təkil etdiyinə görə, Mətbuat  firması tərəfindən xüsusi diplomla təltif edilib. Diplomu Oleq Krapivinə  Mətbuat firmasının rəsmisi Murad Şahməmmədov təqdim edib. Murad Şahməmmədov Oleq Krapivinə  uğurlar arzulamış və respublikamızda idmanın inkişafında göstərdiyi xidmətlərə və verdiyi dəstəyə görə ona təşəkkür etmişdir. O eyni zamanda Oleq Krapivini ad günü  münasibəti ilə təbrik edərək, ona daha uzun və mənalı ömür arzulayıb. Təltif edildiyi fəxri diploma görə Mətbuat firmasına və onun rəhbəri Emin Axundova xüsusi təşəkkürlərini bildirən Oleq Krapivin bundan sonra da Azərbaycanda idmanın inkişafı üçün bütün imkanlarından istifadə edəcəyini bildirib.

Açılış mərasiminin rəsmi hissəsi Azərbaycan Respublikasının dövlət himninin səsləndirilməsi ilə başa çatıb.

 

Yarışla bağlı “Oxu məni” qəzetinə açıqlama verən Şamaxı Olimpiya idman kompleksinin rəhbəri Samir Ədilov deyib ki, kompleksdə keçirilən güləş turniri sayca 6-cıdır: “Görkəmli idmançı, həmyerlimiz, Şamaxının və bütün Azərbaycanın fəxri Oleq Krapivinin şərəfinə keçirilən bu turnir həqiqətən də respublikamızda güləşin inkişaf etdirilməsində mühüm rol oynamağa başlayıb. Bu güləşçilər arasından gələcəkdə mahir güləşçilər çıxacağı şübhə doğurmur.”

Şamaxı Olimpiya idman kompleksinin fəaliyyəti barədə də məlumat verən Samir Ədilov qeyd etdi ki, hazırda kompleksdə bütün idman növləri üzrə məşğələlər keçirilir. Kompleksdə 300-dən artıq uşaq idmanın müxtəlif növləri üzrə məşğul olur: “Burada həmçinin qızların və qadınların da idmanla məşğul olmaları üçün böyük şərait yaradılıb. 24  saat fəaliyyət göstərən kompleksimizdə 50-dən artıq qadın  idmanla məşğul olur. Bundan əlavə yaxın günlərdə biz burada atçılıq kompleksi də açacağıq. Məqsədimiz Şamaxıda bu idman növünün inkişaf etdirilməsi, sağlam ruhlu gənclər yetişdirməkdir. Eyni zamanda Şamaxı güləşdə olduğu qədər futbolda da tanınıb. Kompleksimizin nəzdində futbol məktəbi də fəaliyyətə başlayıb. Biz kompleksimizdə gənclərin məşğul olmalarına daha geniş imkanlar yaratmaq üçün buraya şəhərdən pulsuz avtobus marşrutu açmaq niyyətindəyik. ”

 

 

Qeyd edək ki, bu gün yarış qaliblərinin mükafatlandırılması mərasimi keçiriləcək. Mükafatları qaliblərə Oleq Krapivin və digər rəsmi şəxslər təqdim edəcəklər.

Murad Şahməmmədov, Əziz Mustafa

Bakı-Şamaxı-Bakı

 

BIR CAVAB BURAXIN

Please enter your comment!
Please enter your name here

7 + one =