Hindistanlılar toy etmək üçün Azərbaycanı seçir

0
650

Azərbaycana gələn turistlərin sayı getdikcə artır. Bunu rəsmi statistika da təsdiqləyir. Dövlət Statistika Komitəsinin məlumatına görə, bu ilin I rübündə ölkəyə üz tutanların sayı ötən ilin eyni dövrü ilə müqayisədə 13% çox olub.

“Report” Azərbaycana turist axının güclənməsinin səbəblərini və nəticələrini araşdırıb.

Ərəblərin əlindən otellərdə boş yer qalmayıb

Azərbaycanda dincələn xarici turistlər Bakı ilə yanaşı, ölkənin regionlarına da böyük maraq göstərirlər.

“Report”a açıqlama verən “Premium Travel” şirkətinin rəhbəri Aydın Əhmədov deyir ki, əcnəbilər, xüsusilə də ərəb ölkələrinin vətəndaşları bronlaşdırma məsələsində kifayət qədər ehtiyatlıdır və otellərdə əvvəlcədən yer tuturlar. Son nəticədə indi nəinki bölgələrdəki, hətta paytaxtdakı otellərdə belə boş yer tapmaq müşkülə çevrilib: “Əcnəbilər daha çox şimal-qərb (Qəbələ) və şimal regionuna maraq göstərirlər. Bölgələrdəki otel nömrələrinin əksəriyyətini xarici vətəndaşlar, xüsusilə də ərəblər alıblar. Bakıda da eyni vəziyyətdir. Ötən ay bir neçə dəfə xaricdən gələn qonaqlar üçün paytaxtdakı lüks otellərdə boş yer tapa bilməmişik. Qarşıdan gələn “Formula-1” yarışı günlərdində də yer tapmaq çox çətin olacaq”, – o bildirib.

Toy üçün Bakını seçən hindistanlılar

Azərbaycana marağı artan təkcə ərəblər deyil. Son vaxtlar “İçərişəhər”də qrup şəklində gəzən hindistanlı turistlərə tez-tez rast gəlmək mümkündür. A.Əhmədov bunun səbəbini belə izah edir: “Hindistan vətəndaşları son vaxtlar Bakıda toy etməyə üstünlük verirlər. Artıq bir neçə dəfə onların sifarişi ilə toy etmişik. Bu, bizim üçün yeni bir sahədir. Ancaq onların müəyyən tələbləri var. Məsələn, aşbaz azərbaycanlı ola bilməz, özləri ilə aşbaz gətirirlər. Adətən Hindistandan Azərbaycana 80-100 nəfərlik qrup şəklində gəlirlər. Oteldə qalmağın haqqını isə toyu edən ödəyir. Bunlar kifayət qədər imkanlı insanlardır və Hindistanda varlıların xaricdə toy etməsi adətə çevrilib”.

Həssas çinlilər

Azərbaycanda dincəlməyə üstünlük verənlər həm də Yaponiya və Çin vətəndaşlarıdır. Bununla belə, A.Əhmədovun sözlərinə görə, Uzaq Şərqdən gələnlər digər ölkələrin nümayəndələrindən fərqli olaraq burada qidalanma ilə bağlı müəyyən problemlər yaşayırlar: “Xüsusilə çinlilər qidalanma baxınından çox həssasdırlar. Onlar hər şeyi yeyə bilmirlər. Bu problem isə Bakıda yox, adətən rayonlarda olur. Qalan digər məsələlər qaydasındadır”.

Otellərdən şikayət azalıb, indi onlar özləri şikayət edirlər

Əvvəllər Azərbaycandakı otellərin xidmətindən həmişə şikayət olardı. Həm yerli, həm də xarici turistlər istirahət obyektlərinin malik olduqları ulduzların sayına uyğun fəaliyyət göstərmədiklərini, xidmətin səviyyəsinin aşağı olduğunu deyərdilər. Son vaxtlar isə Mədəniyyət və Turizm Nazirliyi otellərə nəzarəti gücləndirdiyindən onlardan şikayətlər azalıb. İndi otellər özləri turistlərdən, xüsusilə də ərəblərdən şikayət edir. A.Əhmədov deyir ki, söhbət əsasən otel nömrələrinin təmiz saxlanılmamasından gedir: “Məsələn, İraqdan gələnlər barədə Bakıdakı otellərdən bildirirlər ki, onlar nömrənin qapısını, divarlarını yararsız vəziyyətə salırlar. Birləşmiş Ərəb Əmirliklərindən və Qətərdən olan turistlər isə bəzi hallarda Qəbədəki otellərdə özlərini normal aparmırlar. Onlar palçıqlı ayaqqabı ilə nömrəyə daxil olurlar, divanı və s. əşyaları çirkləndirirlər. İndi artıq bələdçilər də məsuliyyət daşıyır. Artıq onların sertifikatı olduğu üçün dediyim problemlər həllini tapmaqdadır”.

Daha bir problem isə ərəblərin “pulunun çox olması” ilə bağlıdır. “Ərəblər çox bədxərcdirlər və onlar buradan ölkələrinə aparmaq üçün balıq kürüsündən tutmuş bala kimi hər şey tələb edirlər. Bəzən oteldən turizm şirkətinə zəng etdirirlər ki, onlara kürü çatdıraq. Elə bilirlər ki, bunu da turizm şirkəti etməlidir”.

BIR CAVAB BURAXIN