Bu günlərdə Azərbaycan Yazıçılar Birliyinin üzvü, yazıçı- jurnalist Qvami Məhəbbətoğlunun “Bibimin Madonna servizi “ adlı kitabı işıq üzü görüb. Yazıçının ədəbi yaradıcılığında yeni səhifə hesab edilən “Bibimin Madonna servizi” kitabı həqiqətən ədəbi həyatımızda yadda qalacaq hadisələrdən biri hesab edilə bilər. Hekayədə təsvir edilən hadisə real həyatımızın bir parçasıdır və müəllif tərəfindən hadisə olduqca şirin bir ədəbi şəkildə qələmə alınıb. Ümumiyyətlə Qvami Məhəbbətoğlunun ədəbi-bədii yaradıcılığında satirik ruh özünəməxsus bir yer tutur və onun tərəfindən qələmə alınan istənilən mövzunun ana xəttində dayanır. Bu baxımdan “Bibimin Madonna servizi” hekayəsində təsvir olunanlar tipik bir azərbaycanlı qadınına xas olan xarakterik xüsusiyyətlərdən biridir. Müəllifin ən böyük ustalığından biri məhz bu xarakterik xüsusiyyəti olduğu kimi oxucuya çatdırmasıdır. Mən hekayənin digər xüsusiyyətlərinə toxunmaq istəmirəm . Yalnlz onu demək istəyirəm ki, “Bibimin Madonna servizi”şübhəsiz ki, ədəbi sahəmizdə özünəməxsus bir iz buraxacaq.
“Bibimin Madonna servizi”dəki satirik ruhlu yazıların hər birində Molla Nəsrəddin ruhu yaşayır. Bu yazılarda günümüzün eybəcərlikləri olduqca ustalıqla tənqid olunur. Əslində qeyd etdiyimiz kimi Qvami Məhəbbətoğlu satirik ruhlu yazıçıdır və günümüzdəki eybəcərliklərə Sabiranə şəkildə gülmək onun ruhunda, canında, qanındadır. Yenə də açıq şəkildə demək istəyirəm ki, bu baxımdan Qvami Məhəbbətoğlunu mərhum satirik şair Baba Pünhanla müqayisə etmək olar. Qvaminin satirik şeirlərinin çoxu vaxtı ilə onun uzun illər işlədiyi “Zaman Azərbaycan” qəzetində çap olunub. Bu satiraların da hər misrasında, hər bəndində günümüzün eybəcərlikləri güclü şəkildə tənqid olunur. Müəllif bununla da həm özü eybəcərliklərə gülür, həm də oxucunu güldürməyi bacarır. Uzun illər Qvami Məhəbbətoğlu ilə çiyin-çiyinə çalışan biri kimi hörmətli qələm dostumuza daha böyük yaradıcılıq uğurları arzulayıram. Əminəm ki, Qvami Məhəbbətoğlu ədəbi dünyamızın Sabiri, Molla Nəsrədddin yolunun ən layiqli davamçılarından biri olduğunu yazacağı yeni satiraları və satirik ruhlu yazıları ilə bir daha təsdiq edəcək.
Əziz Mustafa, yazıçı-jurnalist, Azərbaycan Yazıçılar Birliyinin üzvü
