Qarabağ məsələsində Rusiya öz xeyrinə oyun oynayır

0
592
“Ermənistanın baş naziri Nikol Paşinyanın ifadə etdiyi sərt ritorika sırf Azərbaycana təzyiq xarakteri daşıyır və Moskva ilə əlaqələrin qaydasında, hətta əvvəlkindən də daha səmimi səviyyədə olduğunu nəzərə çarpdırmaq məqsədi güdür”.

Arazinfo.com-un verdiyi xəbərə görə, bu fikirləri azvision.az-a açıqlamasında sabiq dövlət müşaviri, politoloq Qabil Hüseynli deyib. Onun sözlərinə görə, Paşinyanın avatürist mövqeyi münaqişənin hərbi yolla həllinə apara bilər:

“Paşinyanın “Kommersant” qəzetinə verdiyi müsahibədə Dağlıq Qarabağprobleminin həlli ilə bağlı işlətdiyi ifadələr sözün həqiqi mənasında divanəlik, normal diplomatik etiketə yaraşmayan hərəkətdir. Dağlıq Qarabağın hüdudlarından kənarda işğal edilmiş 7 rayonun Azərbaycana qaytarılmayacağı, onun kontitusiya ilə qondarma rejimə aid olduğunu söyləməsi, bu adamın çox avantürist təbiətli və beynəlxalq hüquq, beynəlxalq münasibətlərdən tamam kənar adam olduğunu göstərir. Görünür, bu adam həyasızcasına iddiaları ilə bir daha Azərbaycanı məcbur edəcək ki, danışıqlar prosesi haqqında bəyanat versin və məsələnin hərbi yolla həlli istiqamətində çalışsın.

Hesab edirəm ki, Paşinyanın Moskva səfərindən sonra verdiyi bəyanatlar, regionda vəziyyəti yenidən gərginləşdirmək, danışıqlar prosesini pozmaq, eyni zamanda Azərbaycandan kompromis adı altında ciddi məsələlərdə güzəşt tələb etmək məqsədi daşıyır. Qarşısında duran dövlətin oyuncaq dövlət olmadığını və belə yanaşmalardan çox ciddi nəticələr çıxara biləcəyini düşünmür. Paşinyanın Moskvasəfəri Azərbaycan prezidentinin Rusiyaya səfərinə cavab idi. Bununla göstərmək istəyirdi ki, münasibətlər tam qaydasındadır. Hətta özünün iddia etdiyi kimi guya əvvəlkindən bir qədər də yüksək səviyyəyə qalxıb. Bunların hamısı qeyri-ciddi yanaşmadır. Adamın səviyyəsinin çox primitiv və aşağı olduğu nəzərə çarpır. Belə görünür ki, Paşinyan küçədən gələn biri kimi diplomatiya aləminə tamamilə yaddır”.

Politoloq qeyd edib ki, Qarabağ məsələsində Rusiya öz xeyrinə oyun oynayır: “Bildirilir ki, Soçi görüşündə razılaşdırılmamış, bu səbəbdən də ekspertlərin yenidən işləməsinə verilmiş bəzi məsələlərin razılaşdırılması Rusiya prezidenti Vladimir Putinin Azərbaycana sentyabrın 25-də nəzərdə tutulan səfəri zamanı baş tutacaq. Bunların iqtisadi, yoxsa siyasi məsələlər blokuna aid olduğu barədə məlumat verilmir. Ehtimal edirəm ki, siyasi məsələlər blokuna aiddir və bu istiqamətdə Rusiya Dağlıq Qarabağla bağlı danışıqlar prosesini, bütövlükdə problemi öz nəzarətində saxlamaq istəyir. Bununla da həm Azərbaycanı, həm də Ermənistanı öz orbiti ətrafında hərəkət etməyə məcbur etmək niyyəti güdür. Azərbaycan prezidentinin Soçi səfərindən sonra Rusiya ilə münasibətlər, xüsusilə iqtisadi sahədə əlaqələr tamamilə yeni mərhələyə qalxa bilər.

Amma bizim üçün ən vacib olanı iqtisadi məsələlərlə yanaşı, siyasi, xüsusilə Dağlıq Qarabağ probleminin həllidir. Göründüyü kimi Ermənistanda ipə-sapa yatmayan hakimiyyətin iş başına gəlməsi münasibətləri daha da gərginləşdirib. Rusiya bütün iplərini öz əlində saxlayır və Paşinyan kimi avantüristlərin meydan sulamasına imkan vermək olmaz. Səfər zamanı Dağlıq Qarabağ məsələsi daha ətraflı, daha ciddi surətdə nəzərdən keçirilə bilər və həll varinatları üzərində müəyyən məqbul konsensusa gəlinməsi istiqamətində axtarışlar aparıla bilər. Rusiya bilir ki, Azərbaycanın səbri tükənib və onu öz ərazi bütövlüyünü təmin etməkdən heç nə saxlaya bilməz. Rusiya buna görə də bölgədə yeni müharibənin olmasnı öz maraqları üçün ciddi zərbə hesab edir və qarşısını almağa çalışır. Bunun üçün mütləq Azərbaycanı təmin edəcək varinatlar üzərində düşünməlidirlər. Hər halda Rusiya bu məsələdə sona qədər səmimi mövqe tutmur, desək yanılmarıq”.

Q.Hüseynli vurğulayıb ki, Paşinyan bölgəni müharibəyə sürükləyir: “Paşinyanın son çıxışları o dərəcədə qeyri-etik, qeyri-diplomatikdir ki, hətta sıravi azərbaycanlını belə qəzəblənməyə, hiddətlənməyə sövq edir. Hətta bəziləri lap daş-kəsəklə də olsa ermənilərlə vuruşmaq kimi fikirlərə düşürlər. Dağlıq Qarabağın hüdudlarındakı 7 rayonun qondarma rejimin konstitusiyasına uyğun olaraq ərazisi hesab olunmasına dair fikirlər səsləndirən adamın tam məsuliyyətsiz, siyasi cəhətdən naşı, bölgədə gərginliyin azalmasına yox, artırılmasına xidmət edən təxribatçı olduğu başa düşülür”.

BIR CAVAB BURAXIN